193網店退款事件餘波未了，佢琴晚繼續於IG回應事件：「我唔知點解有人話呢條友有禮貌客氣地詢問，『X街 X你』呢啲係乜嘢禮貌？你唔係話報夢咩？咁我話燒俾你有咩問題？係你冇禮貌在先，我唔覺得需要對你客氣。」而女事主亦有繼續於連登網開po澄清：「係1月、2月同8月ig dm過你無回覆，直至係1/9見到你係Lilaboc到賣月餅，但都係無回覆過dm，無可奈何地先放上連登。郭嘉駿，一直以黎係ig dm你既對話有無禮貌，我相信大家都心中有數。」、「同埋你話自己禁過入去（原post）睇第一頁，但呢個部分（指報夢留言）已經係第二頁。」
網民仍然對事件議論紛紛，更有人呼籲unfollow 193帳戶，不過193表示唔驚，於story表示：「你搞唔死我㗎，好多人都睇得好通透，唔係咁易被帶風向。」不過story被刪去。事件更節外生枝到ERROR其他成員，有網友翻出193 TG group chat嘅紀錄，稱193曾經不指名道姓地透露有團員唔識服裝但好想話事：「今次（團tee）呢件唔係我設計嘅，係某成員設計，設計我完全唔知情，有人好想話事，咁我無理由搶嘢嚟做。所以大家知道設計同埋sizing方面係由一個唔識服裝嘅人話事😂不過無乜所謂嘅，因為無論製成品係點，大家都係會課金。」
有網友懷疑「某成員」就係ERROR嘅Dee哥，更將呢段group chat紀錄DM俾佢。而Dee哥今日亦喺IG story回應，直認就係嗰位好想話事嘅成員，指自己當時比較獨裁心急，更多謝戥佢唔抵嘅網友：「戥我唔抵嘅人，多謝先，因為我覺得你地真心關心我當時感受，所以我感受到濃濃嘅愛意。不過如果時光倒流，我會俾返3爺做返設計，個時我份人係比較獨裁心急，成日自己做planning，單方面想為ERROR做啲事，而忽略咗隊友嘅想法，所以我都上咗一課成長了。」
Dee哥亦有留言力撐好兄弟193，更叫想分化嘅朋友慳返啖氣：「想借舊屎（舊時）嚟搞分化嘅朋友，麻煩你地慳返啖氣，四為一體，四位一體，一世人兩兄弟有你有我，我地四個都知唔係口號，未來我地只會更團結，把握機會做更多好作品娛樂大家！」隊長肥仔亦留言指：「過咗去嘅嘢就由佢過去啦，四歸一超於一齊（切）領域，相信我哋會越做越好。」
Search